DAS NIMMT AUI GENG WUNGER

Ds SQ Hiubi Chiubi gits sit em Jahr 2007. Ir aktuelle Zämäsetzig spile mir sit ändi 2013.

 

Viufach wärde mir (vo nid Bärner) gfragt wieso dr Name "Hiubi Chiubi" u was das das igetlech bedütet. Hie d'Erklärig.

 

Hiubi Chiubi isch Bärndütsch. Ds Wort "hiub" wird igetlech brucht weme d Temperatur beschribt - es isch windstiu, gmüetlech, warm. "I stah ad Huuswang häre, dert isches hiub" mintme, weme sich vom Luft oder Räge wott schütze. Ä Chiubi isch ganz eifach es Fescht. Drum mint dr Ämmitaler, wener vore hiubä Chiubi redt, äs gmüetlechs, u glich fätzigs Fescht wo öppis git.

 

Wo mir di erschte paar Uftritte mit dere Formation hi gha, himer lang nacheme Name gsuecht. Wöus mir bi üsne Uftritte geng luschtig u gmüetlech hi gha oder o es Fescht hi id Gäng tah, hi mir däicht, dr Name "SQ Hiubi Chiubi" passt doch guet zu üs. 

 

"SQ" chame aaluege aus "Schwyzerörgeliquartett" oder "Schwyzerörgeliquintett". Mir si z'föift, gö aber üsserscht säute komplett ga spile. Da mir aui angerswitig ono viu beschäftigt si, cha miischtens öpper vo üs föif sowieso nid, wes drum giit, ä Termin z'finge.


DI MITWÜRKENDE

Margrit Tanner

Bass & Schwyzerörgeli

D Gritlä isch ä liideschaftlechi Chöchi u Muetter vore Tochter. Nid nume ir Chuchi isch d'Gritlä kreativ, am Bass het si scho mängisch Melodie zoge wo niemer hätt däicht, dasme das us däm Instrumänt usebringt. Wes d Zyt näbscht Familie u Arbit zuelaht, isch si im See azträffe oder irgendwo ungerwägs uf Entdeckigsreis. Ursprünglech chunt d'88ere usem Eggiwil u wohnt o iz geng no im schöne Ämmitau.

 

Melanie Brunner

Bass & Schwyzerörgeli, Löffele

D'Melä würkt sit em 2013 i üsere Formation mit. Si isch üsi Exotin, di inzegi wo nid usem Ämmitau stammt u mit Jahrgang 1992 ono grad di jüngschti. D'Huswirtschaftsfachfrou wohnt u wärchet im Oberland. Um d'Melä giit geng öppis, mit ihrer ufgsteute Art het si scho mängs Publikum chönne mitriisse. U wesi de d'Seitene vor Bassgiige zupft, ischs umds Publikum sowieso gscheh. Ir Freizyt gsehtme se öppedie ame guete Feschtli oder ufem Töff.

Franziska Jordi

Schwyzerörgeli

D'Fräne wärchet im Büro vomne Behinderte- u Betagteheim. Si chunnt ursprünglech usem Schangnau, wohnt aber siteme cheerli nümme i däm schöne Dorf, isch am Ämmitau aber tröi blibe. Näbscht em Musige gsehtme d'88er Jahrgängere uf jedere Schiipiste, dusse ir Natur, ufem Unihockeyfäud oder irgendwo ame luschtige Feschtli. Houptsach es giit geng öppis!


Jürg Stalder

Schwyzerörgeli, Bass

Dr glehrt Buur isch ufem euterleche Betrieb u git aus Näbeverdienscht verschidene Orte ga ushäufe. Är wohnt im Eggiwil u het Jahrgang 1990. Jürg wär nid Jürg, wener is dahiime wär. Wener kes Gjufu het wöuer vo iim Ort zum angere springt, de ischsim gar nid baas. Üse Güggu im Chorb überrascht bim üebe viufach mit nöiie Melodie, mi merkt das är fliissig am Örgeli hocket. U ir Zyt wo näbscht em Buure u Musige no fürig blibt, isch är garantiert are urchige Chiubi irgendwo i üsem Ländli aazträffe.

Katrin Rubin 

Schwyzerörgeli

D'Trinä ghört aus 88ere o scho zu dä eutischte i üsere Formation. Si het z'Chäse glehrt u het das wüsse oscho z'Alp agwändet. Mittlerwile isch si ghürate u stouzi Mueter vo zwo Töchtere. Dahiime ufem Euterleche Hof im Schangnau duet si mit dr Familie buure u git ono uswärts ga wärche. Zum Glück fingt si näbscht däm auem ono Zyt zum musige.

Caroline

Gröscht Fan

D'Caroline isch üsi tröii Begleitere. Si git bim Bass dr Ton a u het geng öppe es Döösli Schnupf drbi.